Acca Larentia

Acca Larentia testamento ut in Antiatis historia scriptum est, Romulum regem, ut quidam autem alii tradiderunt, populum Romanum bonis suis heredem facit. Ob id meritum a flamine Quirinali sacrificium ei publice fit et dies e nomine eius in fastos additus.Sed Sabinus Masurius in primo Memorialium secutus quosdam historiae scriptores Accam Larentiam Romuli nutricem fuisse dicit.”Ea” inquit “mulier ex duodecim filiis maribus unum morte amisit. In illius locum Romulus Accae sese filium dedit seque et ceteros eius filios “fratres arvales” appellavit. Ex eo tempore collegium mansit Arvalium numero duodecim, cuius sacerdotii insigne est spicea corona et albae infulae.”