«Si dei habitum corporis tui aviditati animi parem esse statuissent, orbis te non caperet: altera manu Orientem, altera Occidentem contingeres; et, hoc assecutus, scire cuperes ubi tanti numinis fulgor conderetur. Sic quoque, concupiscis, quae non capis. Ab Europa petis Asiam, ex Asia Europam; deinde, si humanum genus omne superaveris, cum silvis et nivibus et fluminibus ferisque bestiis gesturus es bellum. Quid? Tu ignoras arbores magnas diu crescere, una hora exstirpari? Stultus est, qui fructus earum spectat, quarum altitudinem non metitur. Vide ne, dum ad cacumen pervenire contendis, cum ipsis ramis, quos comprehenderis, decidas. Leo quoque aliquando minimarum avium pabulum fuit, et ferrum robigo consumit. Nulla res tam firma est, cui periculum non sit etiam ab invalido.»
- Latino
- Lingua Viva 2
- Versioni dai Libri di Esercizi
