Anacharsis Scytha, vir natione barbarus sed sapientia insignis, Graeciam peregrare instituerat, existimans se apud illam gentem multa sibi profutura ediscere posse. Cum igitur Athenas pervenisset atque Atheniensium contioni interfuisset, multis vanisque verbis auditis: “Rem incredibilem video – inquit: nam apud Graecos, ab omnibus sapientissimos iudicatos, stulti rei publicae praesunt”.
Post victoriam de Hannibale ac Carthaginiensibus, Quintus Metellus in senatu dixit se existimare illam victoriam parum utilem rei publicae fuisse, immo paene Romae obfuisse. Ea enim cum profuerat quidem omnibus, quia pacem restituerat, tum obfuerat, quia Hannibalem ex Italia summoverat: nam Hannibalis adventus virtutem populi Romani e somno excitaverat et, cum ille in Italia adesset, semper Romana virtus vigil promptaque erat. Nunc autem cum Hannibal ex Italia abiisset et hostis pavor deesset, pax ac inertia populo Romano obesse poterant. Virtus enim, nisi in periculis colitur atque exercetur, non superest sed languescit et perit.
- Latino
- Versioni dai Libri di Esercizi
