Antipasti originali

Ministrata est gustatio valde lauta; nam iam omnes discubuerant praeter Trimalchionem, cui locus primus servabatur. In promulsidari asellus erat Corinthius cum bisaccio, qui habebat olivas in altera parte albas, in altera nigras. Tegebant asellum duae lances, in quarum marginibus nomen Trimalchionis inscriptum erat et argenti pondus. Ponticuli etiam ferruminati erant ut sustinerent glires qui melle ac papavere sparsi erant. Tomacula supra craticulam argenteam ferventia posita erant et infra craticulam Syriaca pruna cum granis Punici mali. Dum in talibus sumus lautitiis, Trimalchio ad symphoniam vectus est positusque inter cervicalia minutissima: tale spectaculum nos permovit ut magnum risum exprimeremus. Postquam promulsides gustavimus, repositorium ministratum est cum corbe, in quo gallina erat lignea patentibus in orbem alis, quales sunt gallinis quae incubant ova. Ex improviso in tablinum duo servi accesserunt qui symphonia strepente paleam explorare coeperunt et pavonina ova eruerunt, quae diviserunt convivis. Convertit ad scaenam Trimalchio vultum et dixit: “Amici, pavonis ova gallinae supposui: gustemus igitur hilare!”