Patres conscripti, Micipsa pater meus moriens mihi praecepit ut eniterer domi militiaeque quam maximo usui esse populo Romano: si ea fecissem, in vestra amicitia exercitum, divitias, munimenta regni me habiturum. Quae cum praecepta parentis mei agitarem, Iugurtha, homo omnium quos terra sustinet sceleratissimus, contempto imperio vestro, Masinissae me nepotem et iam ab stirpe socium atque amicum populi Romani, regno fortunisque omnibus expulit. Nunc exul patria, domo, solus atque omnium rerum egens, quo accedam, aut quos appellem? Nationes an reges, qui omnes familiae nostrae ob vestram amicitiam infesti sunt? Aut quisquam nostri misereri potest, qui aliquando vobis hostis fuit? Virtute ac dis volentibus magni estis et opulenti; omnes vobis oboedientes sunt: qua re facilius socio rum iniurias curare vobis licet. Atque ego igitur ad vos confugi, patres conscripti, quibus pro magnitudine imperii ius et iniurias omnes curae esse decet. Nolite pati me nepotem Masinissae frustra a vobis auxilium petere. Patres conscripti, per vos, per liberos atque parentes vestros, per maiestatem populi Romani, subvenite mihi misero, ite obviam iniuriae, nolite regnum Numidiae, quod vestrum est, per scelus et sanguinem familiae nostrae tabescere».
- Latino
- Maiorum Lingua C
- Versioni dai Libri di Esercizi
