Sed iam neque dissimulari neque ferri ultra fames poterat. Itaque dum dictator dilectum Ardeae habet, Capitolinus exercitus, superatis humanis omnibus malis, cum famem unam natura vinci non sineret, vel dedi vel redimi se, quacumque pactione possint, iussit. Tum tribunis militum negotium datum (est) ut paciscerentur. Inde inter Q. Sulpicium tribunum militum et Brennum regulum Gallorum transacta res est, et mille pondo auri pretium factum. Sed di et homines prohibuere (= prohibuerunt) auro redemptos vivere Romanos. Nam priusquam infanda merces perficeretur, Camillus, dictator creatus, intervenit, auferrique aurum de medio et Gallos submoveri iubet. Cum Galli, renitentes, se pactos esse dicerent, Camillus negat eam pactionem ratam esse quae postquam ipse dictator creatus esset iniussu suo ab inferioris iuris magistratu facta esset, denuntiatque Gallis ut se ad proelium expediant. Suos in acervum conicere sarcinas et arma aptare ferroque non auro reciperare patriam iubet. Galli, nova re trepidi, arma capiunt iraque magis quam consilio in Romanos incurrunt. Iam verterat fortuna, iam deorum opes humanaque consilia rem Romanam adiuvabant. Igitur primo concursu fusi Galli sunt.
- Latino
- Maiorum Lingua C
- Versioni dai Libri di Esercizi
