Cum dies quinque ad Cybistra castra habuissem, certior sum factus Parthos ab illo aditu Cappadociae longe abesse, Ciliciae magis imminëre: itaque confestim iter in Ciliciam feci per Tauri pylas. Tarsum veni ante diem tertium Nonas Octobres: inde ad Amanum contendi, qui Syriam a Cilicia in aquarum divortio divîdit; qui mons erat hostium plenus sempiternorum. Hic ante diem tertium Idus Octobres magnum numerum hostium occidimus. Castra paucos dies habuîmus eo ipso loco ubi contra Dareum habuerat (castra) apud Issum Alexander, imperator haud paulo melior quam aut tu aut ego. Ibi dies quinque morati, direpto et vastato Amäno, inde discessîmus. Interim Parthos cedentes ab oppido Antiochia Cassius insecutus, rem bene gessit. Habes omnia.
- Latino
- Maiorum Lingua C
- Versioni dai Libri di Esercizi
