Tullius et Cicero s. d. Tironi suo.
Septimum iam diem Corcyrae tenebamur, Quintus autem frater et filius eius Buthroti. Solliciti eramus de tua valetudine mirum in modum; nec mirabamur nihil a te litterarum nos accepisse, iis enim ventis istim navigatur, qui si hic etiam essent, nos Corcyrae non sederemus. Cura igitur te et confirma et, cum commode et per valetudinem et per anni tempus navigare poteris, ad nos amantissimos tui veni. Nemo nos amat, qui te non diligat. Carus omnibus exspectatusque venies. Cura ut valeas. Etiam atque etiam, Tiro noster, vale.
XV Kal. Dec. Corcyra
- Latino
- Lingua Viva 2
- Versioni dai Libri di Esercizi
