Ita bella toto orbe confecit Octavianus Augustus et Romam revertit, duodecimo anno, postquam consul fuerat. Ex eo rem publicam per quadraginta et quattuor annos solus obtinuit. Ante enim duodecim annis cum Antonio et Lepido tenuerat. Ita ab initio principatus eius usque ad finem quinquaginta et sex anni fuerunt. Decessit autem septuagesimo sexto anno morte communi in oppido Campaniae Atella. Romae in campo Martio sepultus est, vir, quem non inmerito ex maxima parte deo similem esse dixerunt. Neque enim facile ullus imperator eo aut in bellis felicior fuit aut in pace moderatior. Quadraginta et quattuor annis, quibus solus gessit imperium, civilissime vixit, in cunctos liberalissimus, in amicos fidissimus, quos multis evexit honoribus.
- Latino
- Lingua Magistra 1
- Versioni dai Libri di Esercizi
