Brutalità dei duelli tra gladiatori

Casu in amphiteatrum ii et in meridianum spectaculum incidi, lusus videre volens et sales et aliquod laxamentum quo hominum oculi ab humano cruore acquiescant. Contra est: quidquid gladiatorium munus ante pugnatum est misericordia fuit; nunc omissis nugis mera homicidia sunt. Nihil habent gladiatores quo tegantur; ad ictum totis corporibus expositi numquam frustra manum mittunt. Hoc plerique spectatores malunt. Non galea, non scuto repellitur ferrum. Quo munimenta? Quo artes? Omnia ista mortis morae sunt. Mane leonibus et ursis homines, meridie spectatoribus suis obiciuntur, qui interfectores interfecturis volunt obici et victorem in aliam detinent caedem; exitus pugnantium mors est. Ferro et igne res geritur. «Sed latrocinium fecit aliquis, occidit hominem.» Quid ergo? Quia occidit, ille meruit ut hoc pateretur: tu quid meruisti miser ut hoc spectaculum feras? «Occide, verbera, ure! Quare tam timide incurrit in ferrum? Quare parum audacter occidit? Quare parum libenter moritur vel mori non vult? Plagis agatur in vulnera, mutuos ictus nudis et obviis pectoribus excipiant». Intermissum est spectaculum: «Interim iugulentur homines, ne nihil agatur».