In hoc viro tanta vis animi ingeniique fuit ut, quocumque loco natus esset, fortunam sibi ipse facturus fuisse videretur. Nulla ars neque privatae neque publicae rei gerendae ei defuit; urbanas rusticasque res pariter callebat. Ad summos honores alios scientia iuris, alios eloquentia, alios gloria militaris provexit: huic ingenium versatile sic pariter ad omnia fuit, ut natum ad id unum diceres, quodcumque ageret; in bello manu fortissimus multisque insignibus clarus pugnis; idem, postquam ad magnos honores pervenit, summus imperator; idem in pace, si ius consuleret, peritissimus, si causa oranda esset, eloquentissimus. Orationes et pro se multae et pro aliis et in alios: nam non solum accusando sed etiam causam dicendo fugavit inimicos. Asperi procul dubio animi et linguae acerbae et immodice liberae fuit, sed invicti a cupiditatibus animi, rigidae innocentiae, contemptor gratiae, divitiarum.
- Latino
- Versioni Latinum Vertere
- Versioni dai Libri di Esercizi