Caesar eadem celeritate qua solebat usus, saepe conatus est ad pugnam Pompeium provocare, qui autem ne minima quidem audebat. Cum exercitu profectus, Caesar tertio die ad Pompeium pervenit iuxtaque eum castra posuit et postridie, omnibus eductis copiis, acie instructa, Pompeium ad pugnam iterum provocavit. Cum illum suis locis se tenere animadvertit, reducto in castra exercitu, aliud consilium cepit ut cum Pompeio decerneret. Itaque postero die cum omnibus copiis profectus est. Pompeius, Caesaris consilium ignorans, putabat eum discessisse rei frumentariae inopia compulsum; postea, certior per exploratores factus, castra movit, breviore itinere se ei occurrere posse sperans. Quod fore suspicatus Caesar magnis itineribus mane Dyrrachium pervenit, dum primum agmen Pompei procul cernitur.
- Latino
- Maiorum Lingua B
- Versioni dai Libri di Esercizi
