T. Pomponius Atticus, ab origine ultima stirpis Romanae generatus, perpetuo a maioribus acceptam equestrem obtinuit dignitatem. Habebat avunculum Q. Caecilium, equitem Romanum, familiarem L. Luculli, divitem, difficillima natura: cuius sic asperitatem veritus est, ut huius sine offensione ad summam senectutem retinuerit benevolentiam. Hoc facto tulit pietatis fructum. Caecilius enim moriens, testamento adoptavit eum heredemque fecit ex dodrante: ex hac hereditate accepit circiter centiens sestertium. Erat nupta soror Attici Q.Tullio Ciceroni, easque nuptias M.Cicero conciliaverat, cum quo a condiscipulatu vivebat coniunctissime, multo etiam familiarius quam cum Quinto. Utebatur autem intime Q. Hortensio, qui iis temporibus principatum eloquentiae tenebat, ut intellegi non posset, uter eum plus diligeret, Cicero an Hortensius.
- Latino
- Lingua Madre
- Versioni dai Libri di Esercizi
