Ubi ad cibum ventum est, numquam utilis est nimia satietas, saepe inutilis nimia abstinentia: intemperantia quae accidere potest, tutior est in potione quam in esca. Cibus a salsamentis, holeribus similibusque rebus melius incipit; tum caro adsumatur, quae assa optima aut elixa est. Condita omnia duabus causis inutilia sunt, quoniam et plus propter dulcedinem adsumitur, et quod modo par est, tamen aegrius concoquitur. Secunda mensa bono stomacho non nocet, in inbecillo coacescit. Si quis itaque hoc parum valet, palmulas pomaque et similia primo cibo adsumit. Post multas potiones, quae aliquantum sitim excesserunt, nihil edatur, post satietatem nihil agatur. Si quis cibo expletus est, aquae frigidae potione facilius concoquere poterit, postea paulisper invigilet, deinde bene dormiet. Si quis interdiu se implevit, post cibum videat ne frigori neque aestui neque labori se committat: neque enim tam facile haec inani corpore quam repleto nocent.
- Latino
- Lingua Viva 1
- Versioni dai Libri di Esercizi
