Dedalus, Eupalami filius, qui fabricam a Minerva accepit, Perdicem sororis suae filium propter artificii invidiam, quod is primus serram invenit, summo tecto deiecit. Ob scelus in exsilium ab Athenis Cretam ad regem Minoem missus est. Minos, Iovis et Europae filius, cum Atheniensibus belligeravit, cuius filius Androgeus in pugna est occisus. Qui Athenienses vicit et eos vectigales sibi fecit: Athenienses anno uno quoque septenos liberos suos Minotauro mittebant. Theseus, qui a Troezene venit et audivit calamitatem civitatis suae, voluntarie ad Minotaurum venit. Pater, qui eum mittebat, sic ei dixit: “Victor reverte et vela candida in navi habe!”; qui autem ad Minotaurum mittebantur, velis atris navigabant.
- Latino
- Le Fabulae di Gaio Giulio Fedro
- Igino
