Vetusto Macedoniae more regi Alexandro nobilissimi pueri praesto erant sacrificanti. E quibus unus, turiblo arrepto, ante ipsum adstitit, in cuius brachium carbo ardens delapsus est; quo etsi urebatur ita ut adusti corporis eius odor ad circumstantium nares perveniret, tamen et dolorem silentio pressit et brachium immobile tenuit, ne sacrificium Alexandri aut concusso turibûlo impediret aut edito gemitu religione aspergeret. Rex, quo magis patientia pueri delectatus est, eo diutius pueri perseverantiam experiri voluit: consulto enim sacrificavit diutius nec eum a proposito reppulit. Si hoc miraculum Darius conspexisset, scivisset milites eius stirpis vinci non posse, cuius puerilis aetas tanto robore praedita esset.
- Latino
- Maiorum Lingua C
- Versioni dai Libri di Esercizi
