Cum Hannibal Capuam, in qua Romanus exercitus erat, obsideret, Vibius Accaeus Paelignae cohortis praefectus vexillum trans Punicum vallum proiecit, se ipsum suosque comilitones, si eo hostes potiti essent, exsecratus, et ad id petendum subsequente cohorte primus impetum fecit. Quod ut Valerius Flaccus tribunus tertiae legionis aspexit, conversus ad suos: “Spectatores – inquit – ut video, alienae virtutis huc venimus, sed absit hoc dedecus a sanguine nostro, ut Romani gloria cedere Latinis velimus. Ego certe aut speciosam optavi mortem aut felicem audaciae exitum vel solus procurrere paratus sum”. His auditis Pedanius centurio convulsum signum dextra retinens: “Iam hoc – inquit – intra hostile vallum mecum erit: proinde sequantur qui id capi nolunt”. Et cum eo in castra Poenorum irrupit totamque secum traxit legionem.
- Latino
- Versioni Latinum Vertere
- Versioni dai Libri di Esercizi
