Numquam in unum locum convenerant tot tantaeque Romanae copiae, quot quantaeque in Thessalia apud Pharsalum dimicaverunt. Ibi enim Caesar et Pompeius, undique arcessitis atque in aciem productis ingentibus copiis, proelio conflixerunt. Pugnatum est utrimque tanta contentione ut exitus proelii diu incertus fuerit. Victus est denique Pompeius et castra eius direpta sunt. Ipse fugatus Alexandriam petivit, ut a Ptolemaeo, rege Aegypti, cui tutor a senatu datus erat propter iuvanilem eius aetatem, acciperet auxilia. Sed rex, ut sibi Caesaris gratiam conciliaret, occidit Pompeium, caput eius et anulum Caesari misit, qui, videns caput talis viri et quondam generi sui, multas lacrimas fudit et tantam iniuriam nominis Romani vindicare voluit. Itaque cum Alexandriam venisset, Ptolemaeo bellum intulit. Victo et occiso rege, Caesar Alexandriam cepit et regnum Cleopatrae dedit, Ptolemaei sorori.
- Latino
- Maiorum Lingua B
- Versioni dai Libri di Esercizi
