Litterae in senatu relatae sunt Q. Minuci praetoris, cui Bruttii provincia erat, dicentes pecuniam Locris ex Proserpinae thesauris nocte clam sublatam esse nec furum vestigia ulla exstare. Indigne id senatus tulit. C. Aurelio consuli negotium delatum est ut ad praetorem in Bruttios scriberet senatui placere quaestionem de expilatis thesauris haberi, furesque qui pecuniam abstulissent puniri et sacrificia piacularia agi. […]
Curam expiandae violationis eius templi prodigia etiam pluribus locis nuntiata accenderunt: in Lucanis caelum arsisse referebant, Priverni sereno per diem totum rubrum solem fuisse, Lanuvii in templo Sospitae Iunonis nocte strepitum ingentem exortum esse, Frusinone agnum cum suillo capite, Sinuessae porcum cum capite humano natum esse. Decemviri ex libris res divinas easdem, quae post proximum prodigium factae erant, imperaverunt, et praeterea carmen cani iusserunt a septem et viginti virginibus quae per urbem irent donumque Iunoni reginae ferri.
- Latino
- Lingua Viva 2
- Versioni dai Libri di Esercizi
