Ter munus gladiatorium dare volui meo nomine et quinquiens filiorum meorum aut nepotum nomine. Quibus muneribus ad depugnandum ierunt hominum circiter decem milia. Bis athletarum undique accitorum spectaculum populo obtuli meo nomine et tertium nepotis mei nomine. Venationes bestiarum Africanarum meo nomine aut filiorum meorum et nepotum in circo aut in foro aut in amphitheatris populo dedi sexiens et viciens, quibus necata sunt bestiarum tria milia et quingentae. Navalis proelii spectaculum populo dedi trans Tiberim, cavato solo in longitudinem mille et octingentos pedes, in latitudinem mille et ducentos. In quo triginta rostratae naves triremes aut biremes inter se conflixerunt, et multa milia hominum adierunt Romam cum spectaculum videre vellent. Quibus in classibus pugnaverunt, praeter remiges, milia hominum tria circiter.
- Latino
- Lingua Viva 2
- Versioni dai Libri di Esercizi
