Ita proelium restitutum est, atque omnes Germani terga verterunt tam vehementer ut eorum nemo fugere destiterit prius quam ad flumen Rhenum milia passuum ex eo loco circiter L pervenit. Ibi perpauci aut viribus
confisi tranare contenderunt aut, lintribus inventis, sibi salutem reppererunt. Ne Ariovistus quidem fugam vitavit, qui naviculam deligatam ad ripam nactus ea profugit; reliquos omnes consecuti equites nostri interfecerunt. Duae fuerunt Ariovisti uxores, una Sueba natione, quam domo secum eduxerat, altera Norica, regis Voccionis soror, quam in Gallia duxerat a fratre missam: utraque in ea fuga mortua est; duae filiae illi fuerunt: harum altera occisa, altera capta est. C. Valerius Procillus, cum a custodibus in fuga trinis catenis vinctus traheretur, in ipsum Caesarem hostes equitatu insequentem incidit. Quae quidem res Caesari non minorem quam ipsa victoria voluptatem dedit, quod hominem honestissimum provinciae Galliae, suum familiarem et hospitem, ereptum ex manibus hostium sibi restitutum videbat neque eius calamitate de tanta voluptate et gratulatione quicquam fortuna deminuerat. Procillus de se ter sortibus consultum esse dicebat, utrum igni statim
necaretur an in aliud tempus supplicium reservaretur: sortium beneficio is erat incolumis.
- Latino
- Lingua Viva 2
- Versioni dai Libri di Esercizi
