Barbari, consilio Romanorum cognito, praemisso equitatu et essedariis, nostros navibus egredi prohibebant. Quod ubi Caesar animadvertit, naves longas paulum removeri ab onerariis navibus et remis incitari et ad latus apertum hostium constitui, atque inde fundis, sagittis, tormentis hostes propelli ac submoveri iussit: quae res magno usui nostris fuit. Nam et navium figura et remorum motu et inusitato genere tormentorum permoti barbari constiterunt, ac paulum modo recesserunt. At nostris militibus cunctantibus, maxime propter altitudinem maris, qui decimae legionis aquilam portabat, «Desilite exclamavit commilitones, nisi vultis aquilam hostibus prodere: ego certe meum reipublicae atque imperatori officium praestitero». Hoc cum magna voce dixit et se ex navi proiecit; tum nostri universi ex navi desiluerunt.
- Latino
- Lingua Viva 2
- Versioni dai Libri di Esercizi