Vitate quaecumque vulgo placent, quae casus attribuit; ad omne fortuïtum bonum suspiciosi pavidique subsistîte. Munera ista fortunae putatis? Insidiae sunt. Quisquis vestrum tutam agere vitam volet, quantum plurimum potest ista viscata beneficia devitet. Hanc ergo sanam ac salübrem formam vitae tenete, ut corpori tantum indulgeatis quantum bonae valetudini satis est. Durius (corpus) tractandum est ne animo male pareat: cibus famem sedet, potio sitim exstinguat, vestis arceat frigus, domus munimentum sit adver sus infesta temporis. Hanc utrum caespes erexerit an varius lapis gentis alienae, nihil interest: scitote tam bene hominem culmo quam auro tegi. Contemnite omnia quae supervacuus labor velut ornamentum ac decus ponit; cogitate nihil praeter animum esse mirabile.
- Latino
- Maiorum Lingua C
- Versioni dai Libri di Esercizi
