An Scythes Anacharsis potuit pro nihilo pecuniam ducere, nostrates philosophi id facere non poterunt? Illius epistula fertur his verbis: Anacharsis Hannoni salutem. Mihi amictui est Scythicum tegimen, calciamentum solorum callum, cubile terra, pulpamentum fames; lacte, caseo, carne vescor. Quare munera ista, quibus es delectatus, vel civibus tuis vel dis immortalibus dona. Omnes fere philosophi omnium disciplinarum eodem hoc animo fuerunt. Socrates, cum in pompa magna vis auri argentique ferretur, Quam multa non desidero! inquit. Xenocrates, cum legati ab Alexandro quinquaginta ei talenta attulissent (quae erat pecunia temporibus illis, Athenis praesertim, maxima), abduxit legatos ad cenam in Academiam; iis apposuit tantum quod satis esset, nullo apparatu. Cum postridie rogarent eum cui pecuniam numerari iuberet: Quid? inquit Vos hesterna cenula non intellexistis me pecunia non egere?. Quos cum tristiores vidisset, triginta minas accepit, ne aspernari regis liberalitatem videretur.
- Latino
- Versioni Latinum Vertere
- Versioni dai Libri di Esercizi
