Pericles, vir egregia indole et acri ingenio praeditus, Atheniensium rem publicam complures annos administravit. Domi militiaeque prudens administrator ac rei militaris peritus, Athenarum opes auxit semperque rei publicae bonum curavit: ideo rerum scriptores Periclis dominatum populare imperium dixerunt. Athenis tunc vigebat libertas: imperium penes populum erat, divitiarumque cupiditas nondum civium animos invaserat. Athenienses in collem prope Acropolim conveniebant, ubi leges statuebant. Etiam iudices ex civibus eligebant; reus causam dicebat, deinde iudices tesseram aeneam in vase collocabant civemque damnabant aut absolvebant. Pericles igitur civium libertati numquam obstitit, immo iusta populi postulata semper audivit, quamobrem civitatis fama et potentia magis in dies crevit. Leti die propinqui et amici, Pericli moribundo adstantes, victorias et tropaea numerabant; Pericles autem amicorum sermones interpellans: “Sed verum et summum tropaeum”, inquit, “est quod nullus propter me cvium vestem lugubrem sumpsit”.
- Latino
- Versioni dai Libri di Esercizi
