Dictator Manlium in vincla duci iussit. Arreptus a viatore «Iuppiter – inquit optime maxime Iunoque regina ac Minerva ceterique di deaeque, qui Capitolium arcemque incolitis, sicine vestrum militem ac praesidem sinitis vexari ab inimicis? Haec dextra, qua Gallos fudi a delubris vestris, iam in vinclis et catenis erit?». Nullius nec oculi nec aures indignitatem ferebant; sed patientissima iusti imperii civitas erat, nec adversus dictatoriam vim aut tribuni plebis aut ipsa plebs attollere oculos aut hiscere audebat. Coniecto in carcerem Manlio, satis constat magnam partem plebis vestem mutasse, multos mortales capillum ac barbam promisisse obversatamque (esse) vestibulo carceris maestam turbam. Abdicatio dictaturae linguam et animos hominum liberavit: iam ne nocte quidem turba ex eo loco dilabebatur refracturosque (esse) carcerem minabantur cum ex senatus consulto Manlius vinculis liberatur.
- Latino
- Maiorum Lingua C
- Versioni dai Libri di Esercizi
