La battaglia di Canne

Bello Punico secundo L. Aemilius Paulus P. Terentius Varro contra Hannibalem mittuntur Fabioque succedunt, qui abiens ambo consules monuit, ut Hannibalem, callidum et inpatientem ducem, vincerent proelium differendo. Tamen impatientia Varronis consulis factum est ut apud vicum, qui Cannae appellatur in Apulia, pugnaretur amboque consules ab Hannibale vincerentur. In ea pugna tria milia Afrorum pereunt; magna pars de exercitu Hannibalis sauciatur. Nullo tamen proelio Punico Romani gravius victi sunt. Periit enim in eo consul Aemilius Paulus, consulares aut praetorii XX, senatores capti aut occisi sunt XXX, nobiles viri CCC, militum XL milia, equitum III milia et quingenti. In quibus malis nemo tamen Romanorum pacis mentionem faciebat, immo ultimae victoriae spes numquam deficiebatur. Servi, quod numquam ante factum est, manumissi et milites facti sunt. Post eam pugnam multae Italiae civitates, quae Romanis paruerant, se ad Hannibalem transtulerunt.