Antiquitus Roma caput mundi erat, caput urbis autem Capitolium, cui duo erant, et adhuc sunt, cacumina: in priore exstructum erat templum Iovis, in altero Iunonis. Ad Iovis aedem novi consules et magistratus, duces victores exercituum pompa triumphali ascendebant et in ara ante templum sacrificia saepe celebrabantur. Ibi Horatii poetae carmen saeculare pueri virginesque cecinerunt almumque Solem, id est Apollinem, erga Urbem benevolentissimum invocaverunt. Apud Capitolium Quirinalis mons est, veterum Sabinorum sedes. Palatini incolae in vicina valle conveniebant Sabinos, qui collem Quirinalem occupaverant; post multa feraque proelia, tandem foedus inter populos stabiliverunt et unam civitatem ex pristinis duobus fecerunt. Aventinus collis etiam memorabilis est, sive magnitudine illustrium veterum factorum et monumentorum, sive frequentia hominum, maxime fabrorum servorumque. In reliquis collibus Romanis domus villaeque erant, in Aventino monte, quem Tiberis flumen lambebat, plebis insulae aedificatae erant.
- Latino
- Lingua Viva 1
- Versioni dai Libri di Esercizi
