Nono anno post reges exactos, cum gener Tarquinii ad iniuriam soceri vindicandam ingentem collegisset exercitum, nova Romae dignitas est creata, quae dictatura appellatur, maior quam consulatus, ut dictator rei publicae in discrimine subveniret. Eodem anno etiam magister equitum creatus est, qui dictatori oboediret eiusque necessitatibus satisfaceret. Dictator autem Romae primus fuit T. Larcius, magister equitum primus Spurius Cassius.
Sexto decimo anno post reges exactos, seditionem populus Romae fecit, quoniam a senatu atque consulibus premeretur. Tum ipse populus sibi tribunos plebis quasi proprios iudices et defensores creavit, qui plebis rebus caverent et per quos plebei contra senatum et consules tuti esse possent.
- Latino
- Lingua Viva 2
- Versioni dai Libri di Esercizi
