Iam vero domina rerum, ut vos soletis dicere, eloquendi vis, quam est praeclara quamquam divina! Quae primum efficit ut ea quae ignoramus discere et ea quae scimos alios docere possimus. Deinde hac cohortamur, hac persuademus, hac consolamur adflictos, hac deducimus perterritos a timore, hac gestientes comprimimus, hac cupiditates iracundiasque restinguimus; haec nos iuris, legum, urbium societate devinxit, haec a vita immani et fera segregavit. Ad usum autem orationis incredibile est, nisi diligente attenderis, quanta opera machinata natura sit. Primum enim a pulmonibus arteria usque ad os intimum pertinet, per quam vox, principium a mente ducens, percipitur et funditur. Deinde in ore sita lingua est finita dentibus. Ea vocem immoderate profusam fingit et terminat atque sonos vocis distinctos et pressos efficit.
- Latino
- Versioni Latinum Vertere
- Versioni dai Libri di Esercizi
