Medicina est ars quae corporis salutem vel tuetur vel restaurat, cuius materia versatur in morbis et vulneribus. Ad hanc itaque pertinent non ea tantum quae exhibet ars eorum qui proprie medici nominantur, sed etiam cibus et potus, tegmen et tegumen: defensio denique omnis atque munitio, qua nostrum corpus adversus externos ictus casusque servatur. Medicinae artis auctor ac repertor apud Graecos perhibetur Apollo. Hanc filius eius Aesculapius laudabili opere ampliavit. Sed postquam Iovis fulminis ictu Aesculapius interiit, interdicta esse fertur medendi cura, et ars simul cum auctore defecit latuitque per annos paene quingentos usque ad tempus Artaxerxis regis Persarum. Tunc eam revocavit in lucem Hippocrates, Asclepio patre genitus, in insula Coo. Hi itaque tres viri totîdem haereses invenerunt. Prima, quae Methodica appellatur, inventa est ab Apolline; secunda, quae Empirica nominatur, inventa est ab Aesculapio; tertia, quae Logica dicitur, inventa est ab Hippocrate. Empirici experientiam solam sectantur, Logici experientiae rationem adiungunt, Methodici solas morborum substantias observant.
- Latino
- Maiorum Lingua C
- Versioni dai Libri di Esercizi
