Ingens multitudo replevit castra. Tum dictator, auspicato egressus, cum edixisset ut arma milites caperent: «Tuo ductu, – inquit – Pythice Apollo, tuoque numine instinctus pergo ad delendam urbem Veios, tibique hinc decimam partem praedae voveo. Te simul, Iuno Regina, quae nunc Veios colis, precor, ut nos victores in nostram tuamque mox futuram urbem sequare, ubi te dignum amplitudine tua templum accipiet». Haec precatus ab omnibus locis urbem adgreditur. Veientes, ignari iam in partem praedae suae vocatos (esse) deos, et (ignari) Iunonem ipsam, votis ex urbe sua evocatam, hostium templa novasque sedes spectare, in muros frustra discurrerunt.
- Latino
- Maiorum Lingua C
- Versioni dai Libri di Esercizi
