Rex Asiae Attalus legatos Romanos comiter acceptos Pessinuntem in Phrygiam deduxit sacrumque iis lapidem, quae Mater deum dicebatur ab incolis, tradidit legatis qui eam deportarent Romam. Praemissus ab legatis, M. Valerius nuntiavit deae adventum; quaerebatur vir optimus in civitate qui Cybelem rite hospitio acciperet: lectus est P. Cornelius Scipio Nasica, quia maximis virtutibus praeditus putaretur. Qui cum omnibus matronis Ostiam obviam ivit deae: postquam navis ad ostium amnis Tiberis accessit, Scipio in salum nave evectus ab sacerdotibus deam accepit deposuitque in terram. Matronae primores civitatis Magnae Matris statuam acceperunt; eae per manus succedentes, omni effusa civitate, turibulis ante ianuas positis, in aedem Victoriae, quae est in Palatio, portaverunt pridie Idus Apriles, isque dies festus fuit. Populus frequens dona deae in Palatium tulit, lectisterniumque et ludi fuerunt, Megalensia appellata.
- Latino
- Lingua Viva 2
- Versioni dai Libri di Esercizi
