Apud rerum scriptores legimus antiquis temporibus Ninum, Assyriorum regem, principem omnes Asiae gentes in suam potestatem redegisse et magnum imperium rexisse; deinde imperium ab Assyriis translatum esse ad Medos, postquam Sardanapalum eorum regem, nimia felicitate mollem ac imbellem factum, Arbaces Medus imperio vitaque privavit. Constat iisdem fere temporibus Lycurgum Lacedaemonium fuisse iustarum legum latorem et severae disciplinae auctorem, qua Sparta diu floruit; ab Elissa Tyria, quae etiam Dido appellatur, Carthaginem, urbem nobilem atque aemulam imperii Romani, condîtam esse; Caranum, virum generis regii, ab Hercule prognatum, Argos reliquisse et regnum Macedoniae occupavisse. Quare iure Alexander Magnus, post eum septimus decimus Macedonum rex, praedicabat Achillem materni generis progenitorem esse, Herculem paterni (generis). Postremo regibus Philippo et Antiocho, qui a Macedonibus oriundi erant, devictis et Carthagine subacta imperium totius orbis terrarum ad populum Romanum pervenit.
- Latino
- Maiorum Lingua A
- Versioni dai Libri di Esercizi
