Ex aliquot scriptorum sententia, persica arbor nomen cepit a Perside, ubi primum reperta est. A Perside Macedones, post victum Darium, in Graeciam transtulerunt, ex qua in Italiam translata est, paucis annis post Christum natum. Folium eius est linguae simile, flos subrutilus, fructus foris levi lanugine vestitus, sed intus carnosus, pulpae plenus praeter os durum et scabrum. Persica non sunt, sicut fama est, venenata, nam nullus est persicis innocentior cibus. In Aegypto ab Alexandro, Macedonum rege, haec arbor sata et propagata est, quin etiam eius ramis voluit coronari victores. Mira de hac arbore narrantur. Ferunt eam fugienti in Aegyptum Iesu Christo sese inclinavisse eique umbram praebuisse. Quam ob rem imperator Iulianus, in odium nomini Christiani, omnes persicas arbores excidi iussit.
- Latino
- Versioni Latinum Vertere
- Versioni dai Libri di Esercizi
