In antiqua Roma boni mores colebantur; concordia maxima, minima avaritia erat; ius bonumque apud cives non legibus magis quam natura valebat. Iurgia, discordias, simultates cum hostibus exercebant, cives cum civibus de virtute certabant. In suppliciis deorum magnifici, in amicos fideles erant. Duabus artibus, audacia in bello, in pace aequitate, seque patriamque curabant. Quarum artium ego maxima documenta habeo, quod in bello severissime puniebant eos qui contra imperium in hostem pugnaverant aut tardius proelio excesserant; in pace vero beneficiis magis quam timore imperium agitabant et, postquam iniuria accepta erat, ignoscere quam punire malebant.
- Latino
- Lingua Viva 1
- Versioni dai Libri di Esercizi
