Reliquit et gestarum suorum commentarios Gallici civilisque belli Pompeiani. Nam Alexandrini Africique et Hispaniensis incertus auctor est: alii Oppium putant, alii Hirtium, qui etiam Gallici belli novissimum imperfectumque librum supplevit. De commentariis Caesaris Cicero in “Bruto” sic dicit: «Commentarios scripsit: nudi sunt, recti et venusti, sine ullo ornatu orationis». De commentariis Hirtius ita praedicat: «Probantur omnium iudicio; tamen maior nostra quam reliquorum est admiratio; nos enim Caesarem, dum eos facile atque celeriter perscribit, vidimus». Reliquit et “de analogia” duos libros et “Anticatones” totidem ac praeterea poema quod inscribitur “Iter”. Quorum librorum primos in transitu Alpium, cum ex citeriore Gallia ad suas copias revertit, alios sub tempus Mundensis proelii fecit; novissimum, dum ab urbe in Hispaniam ulteriorem quarto et vicensimo die pervenit. Epistulae quoque eius ad patres extant, quas primus ad paginas et formam memorialis libelli convertit. Extant et ad Ciceronem, item ad familiares, in quibus per notas scripsit.
- Latino
- Lingua Magistra 1
- Versioni dai Libri di Esercizi
