Caesar, conversus ad ordinandum rei publicae statum, senatum supplevit et praetorum, aedilium, quaestorum, minorum etiam magistratuum numerum ampliavit. Octoginta autem civium milia in transmarinas colonias distribuit; omnes medicos et liberalium artium doctores, quo libentius Romam incolerent, civitate donavit. Ius laboriosissime ac severissime dixit, poenas facinorum auxit. De ornanda instruendaque Roma, item de tuendo ampliandoque imperio plura ac maiora in dies sibi proponebat: in primis extruere Martis templum, repleto et complanato lacu in quo naumachiae spectaculum ediderat, et aedificare theatrum summae magnitudinis apud Tarpeium montem; in paucissimos libros conferre leges optimas et necessarias ex immensa diffusaque legum copia; publicare bibliothecas Graecas Latinasque, quas maximas posset, data Marco Varroni cura earum comparandarum; siccare Pomptinas paludes; viam munire a mari Adriatico per Apennini dorsum usque ad Tiberim; perfodere Isthmum Corinthium; Dacos, qui se in Pontum et Thraciam effuderant, coercere; Parthis inferre bellum. Talia agentem atque meditantem eum mors praevenit.
- Latino
- Maiorum Lingua B
- Versioni dai Libri di Esercizi
