Animus quotidie ad rationem reddendam vocandus est. Consummato die, cum ad nocturnam quietem recipis, cum sublatum e conspectu lumen est, et conticuit uxor, moris tui iam conscia, totum diem tuum scrutare, factaque ac dicta tua remetire, atque interroga animum tuum: “Quod hodie malum tuum sanasti? Cui vitio obstitisti? Qua parte melior es?” Quare enim quicquam ex erroribus tuis timeas cum possis dicere: “Vide ne istud amplius agas. In illa disputatione pugnacius locutus es; illum liberius admonuisti quam debebas, itaque non emendasti, sed offendisti” Desinet ira et moderatior erit quae sciet sibi quotidie ad iudicem esse veniendum. Quicquam ergo pulchrius hac consuetudine excutiendi totum diem?
- Latino
- Versioni Latinum Vertere
- Versioni dai Libri di Esercizi
