Ita Octavianus Augustus, postquam bella toto orbe confecerat, Romam remeavit, duodecimo anno postquam consul fuerat. Ex eo tempore rem publicam per quadraginta et quattuor annos solus obtnuit et Romae profuit. Antea enim duodecim annos cum Antonio et Lepido rem publicam tenere potuerat. Ita ab initio principatus eius usque ad finem quinquaginta et sex anni interfuerunt. Mortem occubuit autem septuagesimo sexto anno, morte communi, in oppido Campaniae Atella. Romae in campo Martio sepultus est, vir, qui non inmerito ex maxima parte deo similis est putatus. Neque enim facile ullus vir eo aut in bellis felicior fuit aut in pace moderatior. Quadraginta et quattuor annis, quibus solus Augustus Romano imperio praefuit, civilissime vixit, in cunctos liberalissimus, in amicos fidissimus, quos saepe evexit honoribus paene fastigio suo paribus. Nullo tempore ante eum magis Romana res floruit. Nam Romano adiecit imperio Aegyptum, Cantabriam, Dalmatiam, Pannoniam, Aquitaniam, Illyricum, Raetiam, Vindelicos, et Salassos in Alpibus, omnes, Ponti maritimas civitates. Vicit autem multis proeliis Dacos. Germanorum ingentes copias intra paucos dies cecidit eosque trans Albim fluvium summovit, qui longe ultra Rhenum est.
- Latino
- Lingua Viva 1
- Versioni dai Libri di Esercizi
