Nam et oculi nimis argute quem ad modum animo affecti simus loquuntur et is qui appellatur uultus qui nullo in animante esse praeter hominem potest indicat mores quoius uim Graeci norunt nomen omnino non habent. Omitto opportunitates habilitatesque reliqui corporis moderationem uocis orationis uim quae conciliatrix est humanae maxime societatis. Neque enim omnia sunt huius disputationis ac temporis et hunc locum satis ut mihi uidetur in iis libris quos legistis expressit Scipio. Nunc quoniam hominem quod principium reliquarum rerum esse uoluit generauit et ornauit deus perspicuum t illud (ne omnia disserantur) ipsam per se naturam longius progredi quae etiam nullo docente profecta ab iis quorum ex prima et inchoata intellegentia genera cognouit confirmat ipsa per se rationem et perficit.
- Latino
- De Legibus
- Cicerone
