Hoc posito haec iura pontificum auctoritate consecuta sunt ut ne morte patris familias sacrorum memoria occideret iis essent ea adiuncta ad quos eiusdem morte pecunia venerit. Hoc uno posito quod est ad cognitionem disciplinae satis innumerabilia nascuntur quibus implentur iuris consultorum libri. Quaeruntur enim qui adstringantur sacris. Heredum causa iustissima est; nulla est enim persona quae ad vicem eius qui e vita emigrarit propius accedat. Deinde qui morte testamentove eius tantundem capiat quantum omnes heredes: id quoque ordine est enim ad id quod propositum est adcommodatum. Tertio loco si nemo sit heres is qui de bonis quae eius fuerint quom moritur usu ceperit plurimum possidendo. Quarto qui si nemo sit qui ullam rem ceperit de creditoribus eius plurimum servet.
- Latino
- De Legibus
- Cicerone
