Quintus: Aliquotiens iam iste iocus a te tactus est. Sed antequam ad populares leges venias vim istius caelestis legis explana si placet ne aestus nos consuetudinis absorbeat et ad sermonis morem usitati trahat.
Marcus: A parvis enim Quinte didicimus ‘si in ius vocat’ atque alia eius modi leges nominare. Sed vero intellegi sic oportet et hoc et alia iussa ac vetita populorum vim habere ad recte facta vocandi et a peccatis avocandi quae vis non modo senior est quam aetas populorum et civitatium sed aequalis illius caelum atque terras tuentis et regentis dei.
- Latino
- De Legibus
- Cicerone
