Imperator Hadrianus non solum arithmetica, geometria, pictura doctissimus fuit sed etiam poematum et litterarum tam studiosus fuit ut oratione et versu promptissimus esset et in omnibus artibus scientissimus (esset). Etiam armorum et rei militaris tam peritus fuit ut gladiatoria quoque arma tractaret. Ei animus haud simplex fuit: modo severus modo laetus, modo comis modo gravis, modo saevus modo clemens erat et semper in omnibus rebus maxime varius. Amicos, et non petentes, ditissimos fecit, nihil amicis petentibus negabat. Plurimos, quos ad summos honores evexêrat, postea ut hostes habuit: Eudaemonem ad egestatem perduxit, Polyaenum et Marcellum ad mortem voluntariam coegit, Heliodorum famosissimis libellis detrectavit, Titianum ut conscium coniurationis proscripsit; senatores, libertos, denique milites gravissime vexavit. Professores omnium artium et philosophos semper ut doctior risit et contempsit, atque cum iis saepe certavit. Olim Favorinus, nobilissimus rhetor, cum verbum eius ab Hadriano reprehensum esset, atque amici ei dicerent: «Cur imperatori cessisti de verbo, quod etiam homines doctissimi litterisque eruditissimi usurpaverunt?», risum iucundissimum movens, respondit: «Cur vos, amici mei, non vultis me existimare pluris imperatorem quam omnes doctos et eruditos? Imperator triginta legiones habet!».
- Latino
- Maiorum Lingua A
- Versioni dai Libri di Esercizi
