Caesar vidit suos gravîter laborare, quartae cohortis omnibus centurionibus occisis signiferoque interfecto, reliquarum cohortium omnibus fere centurionibus aut vulneratis aut occisis, in his primipilo P. Sextio Baculo fortissimo viro tam multis gravibusque vulneribus confecto, ut iam se sustinere non posset. Vidit etiam reliquos milites esse tardiores, nonnullos proelio excedere et rem esse in angusto neque ullum esse subsidium, quod submitti posset. Tunc, scuto uni militi detracto, in primam aciem processi centurionibusque nominatim appellatis, reliquos cohortatus milites signa inferre et manipulos laxare iussit quo facilius gladiis uti possent. Cuius adventu spe inlata militibus ac redintegrato animo, cum pro se quisque in conspectu imperatoris etiam extremis suis rebus operam navare cuperet, paulum hostium impetus tardatus est.
- Latino
- Maiorum Lingua B
- Versioni dai Libri di Esercizi
