At Hamilcar, posteaquam mare transiit in Hispaniamque venit, magnas res secunda gessit fortuna: maximas bellicosissimasque gentes subegit, equis, armis, viris, pecunia totam locupletavit Africam. Hic cum bellum in Italiam inferre meditaretur, nono anno postquam in Hispaniam venerat, in proelio pugnans adversus Vettones occisus est. Huius perpetuum odium erga Romanos maxime concitavit secundum bellum Poenicum. Namque Hannibal, filius eius, adsiduis patris obtestationibus interire quam Romanos non experiri maluit.
- Latino
- Versioni Latinum Vertere
- Versioni dai Libri di Esercizi
