M. Cato, ortus municipio Tusculo, adulescentulus, priusquam honoribus operam daret, versatus est in Sabinis, quod ibi heredium a patre relictum habebat. Inde hortatu L. Valerii Flacci, quem in consulatu censuraque habuit collegam, ut M. Perperna censorius narrare solitus est, Romam demigravit, in foroque esse coepit. Primum stipendium meruit annos decem septemque natus. Q. Fabio M. Claudio consulibus, tribunus militum in Sicilia fuit. Inde ut rediit, exercitum secutus est C. Claudii Neronis, magnique opera eius existimata est in proelio apud Senam, quo cedidit Hasdrubal, frater Hannibalis. Quaestor obtigit P. Africano consuli, a quo perpetua dissensit vita. Aedilis plebi factus est cum C. Helvio. Praetor provinciam obtinuit Sardiniam, ex qua quaestor superiore tempore ex Africa decedens Q. Ennium poetam deduxerat, quod non minoris aestimamus quam quemlibet amplissimum Sardiniensem triumphum.
- Latino
- Versioni Latinum Vertere
- Versioni dai Libri di Esercizi
