Mario: il cursus honorum di un homo novus

Per idem tempus Uticae forte C. Mario per hostias dis supplicanti magna atque mirabilia portendi haruspex dixerat: proinde ei suadebat ut quae animo agitabat, confisus dis, ageret et fortunam quam saepissime experiretur; cuncta prospere eventura esse dixit. At illum iam antea consulatus ingens cupido exagitabat, ad quem capiendum praeter vetustatem familiae illi alia omnia abunde erant quae opus sunt: industria, probitas, militiae magna scientia, animus belli ingens, domi modicus, libidinis et divitiarum victor, tantummodo gloriae avidus. Ubi primum aetas militiae patiens fuit, stipendiis faciendis, non Graeca facundia neque urbanis munditiis sese exercuit: ita inter artis bonas integrum ingenium brevi adolevit. Ergo, ubi primum tribunatum militarem a populo petit, plerisque faciem eius ignorantibus, rebus gestis notus per omnes tribus facile declaratur. Deinde ab eo magistratu alium post alium sibi peperit, semperque in potestatibus eo modo agitabat, ut ampliore magistratu quam gerebat dignus haberetur. Tamen is consulatum appetere non audebat, quia etiam tum alios magistratus plebs, consulatum nobilitas inter se per manus tradebat. Novus nemo tam clarus neque tam egregiis factis erat, qui indignus illo honore et is quasi pollutus non haberetur.