Mithridatis futuram magnitudinem etiam caelestia portenta praedixerunt. Nam et eo anno, quo ille natus est, et eo quo regnare coepit, stella cometes septuagenis diebus ita luxit, ut caelum omne conflagrare videretur; nam magnitudine sua quartam caeli partem occupaverat et fulgore suo solis nitorem vicerat. Praeterea Mithridates puer suorum tutorum insidias passus est; qui enim, eum de medio tollere conantes, illum indomito equo impositum equitare iacularique cogebant. Cum autem tam turpe propositum adsecuti non essent, Mithridatem veneno necare conati sunt; quod ille metuens, antidotum saepe bibit; itaque se adversus insidias cotidiano usu adeo stagnavit, ut senex voluntariam mortem quaerens, veneno mori non potuerit. Veritus deinde ne ferro ad inimici interficeretur, venandi studium simulavit. Ita per septem annos neque urbis neque ruris tecto usus est, sed per silvas vagatus in diversis montium locis pernoctare solebat; quo modo omnes inimicorum insidias vitavit atque, cum adolevisset, regno potitus est.
- Latino
- Maiorum Lingua B
- Versioni dai Libri di Esercizi
