Modesto: schiavo o liberto?

C. Plinius Statio Sabino suo salutem dicit. Scribis mihi Sabinam, quae mortua est et nos reliquit heredes, Modestum servum suum nusquam liberum esse iussisse, eidem tamen sic adscripsisse legatum: “Modesto, quem liberum esse iussi”. Quaerisne meam sententiam? Rem intuitus sum ac consului peritos iuris. Convenit inter omnes nec libertatem deberi, quia non est data, nec legatum, quia servo suo dedit. At sequitur ut mihi manifestus error appareat, ideoque puto nos, quasi scripserit Sabina, facere debere quod ipsa scripsisse se credidit. Confido accessurum te sententiae meae, quia animus tibi tam probus est ut religiosissime soleas custodire defunctorum voluntatem, quae, cum intellecta est a bonis heredibus, pro iure est. Mos est enim apud nos ut honestas velut apud alios necessitas valeat. Sinamus ergo ut maneat Modestus in libertate; consequatur legatum, quasi omnia Sabina diligentissime caverit. Cavit enim, quae heredes bene elegit. Vale.